सामान्य ज्ञानाच्या आधारावर सर्वसामान्य जनता तसेच निम्न आर्थिक स्तरातील लोकांनाही लखपती होता येईल या भावनेतून हा कार्यक्रम सादर करण्याची कल्पना आयोजक श्रीहरी धर्माधिकारी आणि अनघा मोडक यांच्या मनात आली. हा कार्यक्रम मराठी भाषेत सादर होणार असून त्यात सामान्यज्ञानावर आधारीत प्रश्न प्रेक्षकांना म्हणजेच स्पर्धकांना विचारण्यात येतील. प्रत्येक प्रेक्षकाला बक्षिस मिळवण्याची समान संधी असेल. विविध भेटवस्तू आणि विविध रोख रकमांचा बक्षिसांमधे समावेश असलेला, लाखांची गोष्ट हा रंगमंचावरील पहिलाच कार्यक्रम आहे ! रंगमंचावर यापूर्वी असा कार्यक्रम कुठेही झालेला नाही. या कार्यक्रमातील सर्वोच्च पारितोषक २५ लाख रुपयांचे असून, प्रत्येक कार्यक्रमात ते प्रत्येक प्रेक्षकाला मिळवता येण्याची संधी आहे. या कार्यक्रमाचे लेखन, आणि दिग्दर्शन मिलिंद शिंत्रे यांचे असून, सूत्रसंचालन अभिनेते सुबोध भावे करणार आहेत.
“लाखांची गोष्ट !” ची वैशिष्ट्ये :
अनेक लोकांना ही संधी मिळावी म्हणूनच एका माणसाला या प्रश्नमंजुषा कार्यक्रमासाठी फक्त एकदाच प्रवेश मिळेल.
प्रश्न मराठी आणि इंग्रजी या दोन भाषेतून प्रेक्षकांपर्यंत पोचतील. त्यामुळे इतर भाषकही सहभागी होवू शकतील.
प्रयोग जरी महाराष्ट्रातच होणार असले, तरी संपूर्ण भारतातून कुठूनही स्पर्धक या प्रयोगासाठी येऊ शकतो. निम्न आर्थिक स्तरातील लोकांसुद्धा स्पर्धेत भाग घेता यावा म्हणून बाहेर गावाहून येणाऱ्या प्रत्येक स्पर्धकाला त्याच्या गावापासून ते कार्यक्रमाच्या गावापर्यंतचे रेल्वेचे भाडे दिले जाईल.
संगणकावरील सर्वात जलद उत्तर फेरी (फास्टेस्ट फिंगर फर्स्ट), द्वितीय आणि अंतिम अशा एकूण ३ फेऱ्या होतील.
प्रश्नमंजुषा स्पर्धा आणि तिचे सर्व नियम, अटी आणि पूर्ण रूपरेषा कळण्यासाठी www.lakhanchigoshta.com या संकेतस्थळाला भेट द्यावी याच संकेतस्थळावर ऑनलाइन नाव नोंदणी चालू झाली असून १८ वर्षे पूर्ण असलेल्या व्यक्तीस स्पर्धेत सहभागी होता येणार असल्याचे आयोजकांनी सांगितले.
