रत्नागिरी संघाविरुद्ध ठोकल्या नाबाद २१० धावा; रायगड संघाचा अभिमान उंचावला
गिरीश भोपी, रायगड /पनवेल
कामोठे गावातील नगरसेवक रवी दादा गोवारी यांचे सुपुत्र प्रज्वल गोवारी यांनी क्रिकेटच्या मैदानावर आपल्या शानदार फलंदाजीने सर्वांचे लक्ष वेधून घेतले आहे. महाराष्ट्र क्रिकेट असोसिएशन आयोजित U-14 इन्व्हिटेशन लीग स्पर्धेत रायगड संघाकडून खेळताना प्रज्वल यांनी रत्नागिरी संघाविरुद्ध तब्बल नाबाद २१० धावांची दमदार खेळी साकारली.
अल्पवयातच आपल्या उत्कृष्ट फलंदाजीच्या जोरावर प्रज्वल यांनी क्रिकेट क्षेत्रात उल्लेखनीय कामगिरी केली असून, त्यांच्या या खेळीमुळे कामोठे गावासह रायगड जिल्ह्याच्या शिरपेचात मानाचा तुरा रोवला गेला आहे.
त्यांच्या या उल्लेखनीय कामगिरीबद्दल सर्व स्तरांतून त्यांच्यावर कौतुकाचा आणि अभिनंदनाचा वर्षाव होत आहे. जिद्द, मेहनत, सातत्य आणि क्रिकेटप्रती असलेली आवड यांच्या जोरावर प्रज्वल यांनी यशाचे पहिले मोठे पाऊल टाकले आहे.
प्रज्वल गोवारी यांनी भविष्यात राज्य आणि राष्ट्रीय स्तरावर उत्कृष्ट कामगिरी करून भारतीय क्रिकेट संघात स्थान मिळवावे, अशी अपेक्षा व्यक्त केली जात आहे.



